ALPINISTICA Olperer (A) del 03-04/10/2009

En ottobre ormai tutti i rifugi i e´ serai... ma ghe n´e´ giust uno che sèra doman, e l'è propri soto na zima de tutt rispett e l'è anni che g'ho la fissa de nar a farla: l'Olperer! Ricomposta la spediziom de salita alla pù alta vetta austriaca (Gross Glockner 2008), ne trovém alle 3 a Roveredo mi, l'Alessandro e l'Andrea e partim... per l'Austria! Alle 5, passà el Brennero ne enfilém a destra enfont alla ValserTal e trati zaini en spalla e scarponi ai pei: gh'è da nar! A veder bem i me Nepal Extreme, en realtà me preoccupo bem en pel a pensar alla rampegada che ne speta doman: diaolopò, ormai la söla en ponta lè finia... doman sarà brigos rampegar su per le roccette! Ne enviém su per la forestale passando en fianc a en muciom de nef alt 4 metri de na valanga residua dell'an passà (diaolopo'... sem a 1500m de quota... e en ottobre!), quindi dopo na bona quarantina de minuti arrivém alla teleferica endò gh'è la Jeep del rifugista parcheggiada (ma come??? L'è targada Bolzan! Ecco perchè quando ho ciamà per prenotar mi parlevo en todesc e lori i me rispondeva en taliam!). Da qi se gira su per el bosc a sinistra e se la mponta dritta... beh.... dritta... en realtà l'è tutt na serie de serpentine longhe eterne, che l'Alessandro e l'Andrea i pensa bem de taiar pù volte per sveltir i tempi: i ne speta su per le 6 ma con ste larghe serpentine e i segnavia che i dà el rifugio a 2 ore e 1/2, sarà bem dura! Beh, dai, senza zena no i ne laserà: anzi! No podém propri resister a mpienirne el stoméc de bei mirtilli grossi e mauri en fianc a ogni curva... eheh... roba da portarse drè el petém per binarli su! Arrivai sulla balza gh'è ancor 300 metri de dislivel, anca se a vardar la teleferica che entra longa en piano, de zerto se ghe volerà ben pù de mezora per arivar al rifugio! Ore 7 ghe sém! Giust el temp de na radler e subit ne sentém al taol entrando prest en confidenza coi gestori che i è propri giusti: na famiglia (mare, pare, e fioi) che prima gestiva el rifugio Cima Libera... a 6 ore a pè dala civiltà, ma adess che i fioi i è cresui i s'è svizinai con sto bel Geraer Hütte. A sentir el gestor, che l'è guida alpina, (anca se stamattina el temp no l'era massa bel) l'Olperer i l'ha fatt n gruppo de todeschi: condiziom discrete... en po' de ocio a saltar i crepi (e l ne spiega per filo e per segno la via da far sul ghiacciaio), ma el problema semmai l'è la nef residua che è restà en gresta dall'ultima fiocada de 20 dì fa: gh'è da rampegar probabilmente coi ramponi. Vederem! Prima dele 6 e 1/2 no sciariss, quindi co la colaziom alle 6 e la sveglia alle 5 e 3/4, ne fiondém en camera da let a butar zò i ossi. Col giro de grappa della buonanotte però, ne informen anca sul temp de salita e l ne rassicura che prima delle 3 dopodisnar l'è impossibile che sente de volta al rifugio: e orca! Per na zima de 1300m de dislivel e 200m de gresta de II??? Par massa!!! E allor el ghe scommette en giro de grappe che no sarém boni de tornar prima: e noi, allor... ne tirerém ancor de pù el col! Sveglia alle 5 e 3/4, preparém i zaini e fatta colaziom alle 6 e 1/2, ariva quasi le 7 che ne enviém a pé precedui sol da na cordata de nordtirolesi: na bona mezzora su per senteri e morene, e finalmente se salta sul giàz: el prim toc, vist tuti i sassi che salta for, se va comodi ancor senza ramponi, ma dopo 50 metri, ne fermem a trarli sotto i pei...e difatti i tirolesi che ha volèst far a men per 200 metri dei Steigeisen soto i pei, i e' restai endrio de brutto. Aggirà da destra na prima crepacciada, ne tocca traversar vers sinistra tra parecchi crepi scoerti: l'Alessandro che l'è pù lizér de mi, el sta kepocordata, po', quando la se mponta dritta (e par anca en toc sicur) passo mi. Finalmente la spiana e arrivém en vista dei impianti de Hintertux! E adess? eheheh... adess per el Kepo gh'è el pezo: le roccette! No capìm subit da dove besogn empontarle, alla fin, dopo esserne slongai la corda, saltém su per l'ert scivolo de nef a destra della gresta e guadagnando altri 70 metri passém for la terminale toccando... roccia. El prim toc saltem su diagonalizzando vers destra (en pel pù difizile della NormalWeg, ma co l'Andrea kepocordata en roccia, sem en te na bot de fer!). Fatta na sosta sora en camin, el secont tiro l'è tra pioli (sporchi de giaz) e n'altro camin e... diaolopo'! Se al caminét del prim tiro evo sentù balar la spalla, su sto camin, propri per el movimento de opposiziom... la salta fora!!! E resto così enciodà en mez al camin co la spalla fora a pensar sa far, per en bom minut... po'... provo la solita manovra di "rientro" della spalla: en par de pache e difatti la salta rento al volo... ma continuar l'e' n'azzardo! E allor, arrivà dai altri, ghe digo a malincuor che me toca lassar perder el Berg Heil de vetta: i speterò qi ancorà a en sass. E quindi lori i riparte de bala senza trar rento nient, e tutta en conserva i taca a passar cordate. Mi, enveze, resto subit ciavà dal sol: no l'era massa fret al sol, ma dopo appena 10minuti (sem en esposiziom nord) el sol el passa drio la gresta e resto en ombra: che frettttt!!! Da magnar no g'ho drio nient, ma demo' el fiachett de sgnapa en po' de calt el me lo tegn! Entant fago 4 ciacere con le cordate che passa su: dopo n'ora na putela che la me vede engiazà e bianc come na peza, la encrosa l'Andrea e l'Ale e la ghe diss che sotto ormai i g'ha en gefroren Freund... po' passa su en putél de Innsbruck che el me conta de esser partì stamatina da Schmirn: l'è arivà qi en tre ore, diaolopo' che scheggia!!! Passa su po' en vecio camòz de Innsbruck del soccorso alpin e el vol calarme zo' a tutti i costi sul ghiacciaio co la cordèla da 30 metri... dopo che l'è sta a trafficarme entorno 20 minuti tra groppi e desligar corde, g'ho da far le mie a farghe capir che voi spetar i me soci che co na corda da 60 i me cala zo dirett senza far do' tiri (e doverme tacarme a metà sul nient!). Finalmente en ten par de ore (anca se i diss de men... a mi m'è parest de pù), propri entant che torna el sol da drio la gresta ecco che torna l'Ale e l'Andrea! I me cala zò de bala e na volta sul ghiacciaio som rilassà come esser a cà! Smontèm zò dal scivol de nef e dal ghiacciaio. NE fermen n'attimo a cavar i ramponi e saludar i putéi de Innsbruck (che entant ha zà fat zima e i è drio a tornar de volta de corsa en Schmirntal) propri entant che en marocc el rugola zò en velocità sul ghiacciaio e... el ne se frantuma su na rosta a neanca 50metri: diaolopo'! Zò de bala per la morena e arrivém al rifugio alle 3 e 3/4... diaolopò, scomessa sbusada! Anca se però el gestor i grappini el ne li offre volentera istess! (en realtà no i bevem, dato che dopo na bona birraccia, no podém farne taiar le gambe col la discesa che ancor ne speta. Zò de bala dal senter, forestale eterna, e per le 5 e 1/2 sem ala macchina. Dai, l'avém portada for anca questa... ma de roccette, prima de passar dai macellai che me sistema la spalla, no voi pù saerghen!









Se risale tuta la ValserTal (e ... ricordeve che qi i la ciama Falsertol!) per po', passa' el dossom, scominziar a guadagnar metri...
...sui prai de sinistra. Drio el Kepo, svetta el Schrammacher
E finalmente, giusti per l'ora de zena arrivem al Geraer Hutte! Mahlzeit!
La mattina, zaini en spalla e via de balla!
Ancor albeggia che avem za' passa' le morene (drio l'e' la luna piena, miga el sol)...
..e l'e' subit ora de giaaaaazzzz!!!
Arrivai al passo (en mez ai impianti de Hintertux) ne lighem per la progressiom su roccette... diaolopo'...
.. ma i primi zento metri i schivem bem, sfruttando el scivolo a destra dela gresta!
Col Kepo ancora' pu' en bass alle roccette a... leccarse la spalla... e trinkar cicchettini de sgnappa per tegnirse calt, la progressiom dell'Andrea e l'Alessandro la procede spedita e...
Berg Heil!
E adess... ne speta l'eterno rientro vers el rifugio e la macchina!
Finalmente se pol polsar... ma ghe la farente a esser de volta per zena? Eh eh... sto colp el col ghe'l tirem alla vecia Polo!


Ste pagine l'e' stae cargade volte da visitatori dal 3 de agost 2005